Udaltop bloga

Udaltop Topaketetan landuko den gaiarekin, nerabeen aisialdian eta lagunartean euskaraz aritzeko zer eta nola egin, lotura duten hainbat esperientzi daude Euskal Herrian. Horietako bat da Mikel Troitiño (1969) eta Haritz Larrañaga (1976) surflari zarauztarrek gauzatutakoa. Surfa nerabe eta gazteekin lotuta egon ohi den kirola da, nahiz eta adin guztietako jendea aritzen den.

Troitiñok eta Larrañagak 1991n Zarauzko Surf Eskola sortu zuten eta orduz geroztik munduan eman diren pausoak gertutik jarraitzen ahalegindu dira. Euren urtetako esperientzia besteei zabaltzeko orduan, ordea, bada etengabe garatu behar izan duten elementu bat: surfaren munduan erabiltzen diren hitzen euskarazko hiztegia. Surfa kanpotik etorritako kirola izanik erabiltzen diren hitzak ere beste hizkuntzetakoak dira. Baina, bi surflari zarauztarren helburua, surfa irakasteko erabiltzen duten hiztegia euskarazkoa izatea izan da. Horregatik hiztegiaren bertsio bat (PDF) argitaratu bazuten ere, etengabe berritzen dihardute.

Bestalde, surfa egiten hasteko eta pixkanaka urratsak egiteko aholkuak eta irakaspenak biltzen dituzten bi DVD argitaratu dituzte. Bi DVDak euskaraz eta ingelesez daude, beraien helburua euskarak surfaren munduan leku garrantzitsua izatea baita. Gaur egun ez daude dendetan salgai baina, Surf Eskolarekin harremanetan jarriz gero eskuratu daitezke (Tel. 943019507).

Argia astekarian gai honen inguruan argitaratu zen erreportajea hemen dago irakurgai, baita multimedia kanalean zintzilikatu zuten bideoa ere.

Kontraesankorra badirudi ere, Udaltopen bigarren edizio honetan apirilaren 21ean eta 22an hizlari ikusiko ditugunak dagoeneko hasita daude beren aldez aurreko ponentziak idazten. Izan ere, iaz hasitako lan-estiloarekin jarraituz, topaketak baino bi hilabete lehenago izango ditugu (idatzitako) ponentziak zintzilikatuta, eta, ondoren, topaketetan bertan, hizlariek ez dute ponentzia errepikatuko, han idatzitakoak osatu eta bertaratutakoekin (hitzez) trukatu baizik.

Programa itxitzat-edo jo dugu, eta, egunak eta orduak erabat zehaztuta ez baldin badaude ere, honela egituratu ditugu topaketak:

Teoriaren atalean, Pello Jauregi irakaslea izango dugu gure artean, “Esku hartzeko hainbat ildo, hurbilketa sistemikotik begiratuta” izenburua jarri dion ponentziarekin.

Ikerketaren eremuan, berriz, “Gazteen erabileraren korapiloa begi-bistan” azterlana izango dute mintzagai Jaime Altunak eta Asier Basurtok. Horretaz gain, Igor Calzada izango dugu HPS sare sozialen gainean egiten ari den ikerketaren berri emateko. Eta, gai bertsuaren jiran, “nerabeak, sare sozialak eta euskara” puntutzat jarrita, Gotzon Egiak Gorka Julio eta Luistxo Fernandez elkarrizketatuko ditu; idatziz aurrena eta ahoz han bertan.

Eta Udaltop II honen galdera nagusitzat jarritako Zer eta nola egin daiteke udaletatik nerabeek aisian eta lagunartean euskara gehiago erabiltzeko? galderari erantzuten hasi nahian, hainbat esperientzia ere izango ditugu gure artean.

Bermeon, udal barrutik bertatik egindako esperientzia kontatuko digute Maite Alvarezek eta Iñaki Lopezek. Ikastetxetik abiatuta izandako esperientzien artean, alde batetik, Glissegunaz hitz egingo digute Seaskako Ramuntxo Etxeberrik eta Estelle Goñik. Beste alde batetik, Jaime Altunak Deban abiatutako HEZHIZ (HIZkuntza HEZiketarako dinamizazioa) programaz hitz egingo digu. Aisialdiko eta lagunarteko programez jarduteko, Kultur Kabiako Aritza Escandon eta Ttakun Kultur Elkartekoak izango ditugu, eta, azkenik, Alberto Irazu izango dugu gure artean, “Nerabe eta gazteen kultur kontsumoa: GAZTEZULOren esperientzia” hizpide hartuta.